Renaté se moeder se buurvrou se Semelbeskuit

Vriendin Renaté is die bron vir dié resep, maar Sonja het bietjie daaraan gekarring & sonneblomsaad & klapper as 'n eksperiment bygevoeg. Nodeloos om te sê: dis nou hoe ons dit doen. Natuurlike joghurt kan gebruik word in plaas van karringmelk. Die resep lewer 3 pannetjies beskuit.

Bestanddele

• 1kg Bruismeel
• 250ml Suiker
• 10ml Bakpoeier
• 10ml Sout
• 250g Botter
• 875ml Semels
• 500ml Karringmelk
• 125 ml Kookolie
• 3 Eiers
• 75ml Klapper (opsioneel)
• 75ml Sonneblomsaad (opsioneel)

Só maak mens

1. Meng bruismeel, sout, bakpoeier & suiker.
2. Vryf botter daarin.
3. Voeg semels by & meng deeglik.
4. Klits eiers & karringmelk saam; voeg dit saam met die olie by die droë bestanddele.
5. Meng deeglik.
6. Plaas in gesmeerde broodpanne & bak vir 50 minute teen 180°C (350°F).
7. Laat dit afkoel, sny in beskuite & droog uit.